ХҚКО жабылмайды, бірақ жұмысы өзгереді

Үкіметтегі брифингте жасанды интеллект және цифрлық даму вице-министрі Ростислав Коняшкин халыққа қызмет көрсету орталықтарының (ХҚКО) болашағы туралы айтты. Оның сөзінше, ХҚКО-лар мүлде жабылып кетпейді, бірақ біртіндеп жаңа форматта жұмыс істейді.

Қазір азаматтар жеке куәліктің мерзімі өтіп кетсе, оны онлайн түрде ауыстыра алады. Биыл тағы бірнеше қызмет интернет арқылы қолжетімді болмақ. Мысалы, жоғалған жеке куәлікті қайта алу және жеке куәлікті қайта шығару мүмкіндігі пайда болады. Сонымен қатар, алдағы уақытта төлқұжатты да онлайн рәсімдеу жоспарланып отыр.

Жүргізуші куәлігін жаңарту қызметі қазірдің өзінде интернет арқылы қолжетімді. Болашақта бұл қызметті тек онлайн түрде алу көзделіп отыр.

Вице-министрдің айтуынша, телефон арқылы қызмет алу әлдеқайда ыңғайлы. Сондықтан ХҚКО-лар біртіндеп «цифрлық кеңселерге» айналады. Онда операторлар құжат жасап бермейді, керісінше азаматтарға онлайн қызметтерді қалай алу керегін түсіндіріп, көмектеседі.

Сонымен қатар, кейбір адамдар ХҚКО-ға барып, маманнан тікелей көмек алғанды жөн көреді. Осы себепті халыққа қызмет көрсету орталықтары толықтай жабылмайды. Қалаларда өзіне-өзі қызмет көрсету аймақтары сақталады.

Яғни, ХҚКО бұрынғыдай жұмыс істемейді, бірақ халыққа қызмет көрсетуді жалғастыра береді – тек жаңа, цифрлық форматта.