Астаналық оқушы Ермұхамед Түктібай халықаралық университеттердің грантын жеңіп алды

Астанадағы №9 «Зерде» мамандандырылған лицейінің 11-сынып оқушысы Ермұхамед Түктібай халықаралық деңгейдегі жетістіктерімен көзге түсіп, әлемнің жетекші университеттерінен шақырту алды. Жас талапкер бірден бірнеше беделді оқу орнының білім грантына ие болды.

Ермұхамед QS әлемдік рейтингінде алдыңғы орындарда тұрған The University of Hong Kong (HKU) университетіне «Машина жасау» мамандығы бойынша оқуға шақырылды. Сонымен қатар, The Hong Kong Polytechnic University және City University of Hong Kong университеттері оған оқу ақысы мен тұру шығындарын толық өтейтін гранттар ұсынды. Мамандар мұндай ұсыныстар сирек кездесетінін, бұл Ермұхамедтің академиялық деңгейінің ерекше жоғары екенін көрсететінін атап өтті.

Жас талапкердің білім көрсеткіштері де таңғаларлық. Халықаралық емтихандарда ол мынандай нәтижелерге қол жеткізді: SAT – 1540 балл (оның ішінде математикадан 790 балл), IELTS – 8.0, бұл ағылшын тілін академиялық деңгейде еркін меңгергенін дәлелдейді. Сарапшылардың айтуынша, мұндай ұпайлар әлемнің ең мықты университеттеріне түсуге мүмкіндік береді.

Ермұхамед тек тест нәтижелерімен шектелмей, тәжірибеге бейім жас зерттеуші. Оның инженерлік жобалары материалдардың төзімділігін зерттеуге бағытталған. SolidWorks бағдарламасында тісті берілістерді жобалап, 3D-баспа арқылы жасап, түрлі полимерлердің тозу деңгейін сынақтан өткізген.

Сонымен қатар, жас ғалым математика мен өнердің тоғысын да зерттеді. Ғылыми жобасы аясында ол суретші М.К. Эшердің парадокстарын визуалды-математикалық тұрғыдан талдап, «мүмкін емес» фигура ретінде танымал Пенроуз үшбұрышының физикалық моделін құрастырды. Бұл оның креативті ойлау қабілеті мен ғылыми ұғымдарды практикада қолдана алуын көрсетті.

Мамандар Ермұхамедтің жетістігін тек жеке табыс ретінде ғана емес, сонымен қатар қазақстандық оқушылардың жаһандық білім кеңістігінде бәсекеге қабілетті екенін дәлелдейтін маңызды көрсеткіш деп бағалайды. Болашақта жас талапкер инженерия саласында ірі жаңалықтарға жол ашуы мүмкін.

Айта кетейік, осы мектептің тағы бір 11-сынып оқушысы Аяла Серікқызы да әлемнің ТОП-10 университетінен шақырту алған. Олардың қатарында Harvard University, Brown University, University of Cambridge, Stanford University, MIT сияқты әлемдік беделді оқу орындары бар.