Сарайшық ауданында жаңа кинотеатр ашылады

Астананың Сарайшық ауданында жаңа сауда-ойын-сауық орталығы ашылады. Бұл туралы аудан әкімі Мақсат Саматұлы әлеуметтік желідегі парақшасында мәлімдеді.

Әкімнің айтуынша, 2026 жылдың мамыр айында А.Байтұрсынұлы мен М.Тынышбайұлы көшелерінің қиылысында орналасқан «Jibek Joly» сауда-ойын-сауық орталығы пайдалануға беріледі. Құрылысы 2024 жылдың үшінші тоқсанында басталған нысанның жалпы аумағы – 16 347 шаршы метр. Бес қабатты ғимарат аудан тұрғындарының сұранысына сай заманауи әрі көпфункционалды қоғамдық кеңістік ретінде жобаланған.

Аудандағы алғашқы кинотеатр

Жаңа орталықта Сарайшық ауданындағы алғашқы кинотеатр ашылады. Онда әрқайсысы 100 орындық төрт зал жұмыс істейді. Бір мезетте 400 көрерменді қабылдай алатын кинотеатр тұрғындардың мәдени демалысқа қолжетімділігін арттырмақ.

Көпфункционалды қоғамдық кеңістік

Сауда орталығында шамамен 70-ке жуық сауда орны ашылады деп жоспарлануда. Мұнда:

• мейрамханалар мен кофеханалар,

• фудкорт аймағы,

• супермаркет,

• дәріхана,

• сұлулық салоны,

• химиялық тазалау қызметі,

• балалар мен ересектерге арналған дүкендер жұмыс істейді.

Сонымен қатар, шамамен 4 000 шаршы метрді құрайтын балалар мен жасөспірімдерге арналған ойын аймағы қарастырылған. Бұл кеңістік отбасылық демалыстың жаңа орталығына айналмақ.

Қолжетімді орта және инфрақұрылым

Жоба аясында ерекше қажеттілігі бар азаматтарға қолайлы жағдай жасауға ерекше назар аударылған. Ғимаратта пандустар, жеделсатылар орнатылады және ыңғайлы автотұрақ қарастырылады.

Аудан әкімінің сөзінше, бұл жоба инфрақұрылымды дамытуға, жаңа жұмыс орындарын ашуға және тұрғындардың өмір сапасын арттыруға бағытталған маңызды қадам болмақ. Жаңа орталықтың ашылуы көктемге жоспарланған.

Сарайшық ауданында алғаш рет кинотеатрдың ашылуы — елорданың қарқынды дамып келе жатқан бөлігінде мәдени және қоғамдық кеңістіктің кеңейіп келе жатқанын көрсетеді.