Аптаның маңызды жаңалықтары

• Ипотекаға алынатын тұрғын үйді сатып алу-сату келісімшартын рәсімдеу құны қайтадан 4 АЕК (2026 жылы – 17 300 ₸) болып бекітілді. Жыл басында бұл тариф 12 АЕК (51 900 ₸) болған еді. Әділет министрлігі нотариалдық тарифтерге өзгеріс енгізді.

• 19 наурыздан бастап Қазақстан банктері ағымдағы шоттардағы қаражатқа жылдық 1%-ға дейін сыйақы есептей бастайды. Пайыз шоттағы нақты сомаға есептеліп, әрбір толықтыру немесе шешімнен кейін қайта қаралады. Мысалы, 100 мың ₸ үшін жылына шамамен 1000 ₸ табыс алуға болады.

• Енді жүргізушілер жол ережесін бұзу сәтіндегі бейнежазбаны сұрата алады. Бұл үшін Freedom SuperApp қосымшасындағы «Айыппұлдар» бөлімін қолдану керек. 10 секундқа дейінгі видео push-хабарлама арқылы келіп, қосымшада 14 күн сақталады.

• IT және жасанды интеллект бағытында тегін онлайн курстарға тіркелу басталды. AqylTech бағдарламасы 18–36 жас аралығындағы жастарға, ал IT-Aiel – әйелдерге арналған. Қатысушылар IT, AI мамандықтары мен қаржылық сауаттылық негіздерін меңгереді. Тәжірибе талап етілмейді.

• 12 наурыздан бастап камералар мен дрондар қауіпсіздік белдігін тақпау және рөлде телефон қолдану фактілерін автоматты түрде тіркеп, айыппұл салады. Айыппұл полиция қызметкерлерінің қатысуынсыз рәсімделеді. Сонымен қатар жүйе сақтандыру немесе техникалық тексерудің жоқтығын да автоматты анықтайды.

• Енді Конституция күні 30 тамызда емес, 15 наурызда аталып өтеді. Бұл күн ресми түрде мереке және демалыс күні болады.

• Наурыз мерекесі қарсаңында сауда орталықтары мен дүкендерде 70%-ға дейін жеңілдіктер жарияланды. Акцияға шамамен 300 сауда нүктесі қатысады. Олардың қатарында Magnum, Small, Galmart, Toimart, «Анвар» және ірі сауда орталықтары бар.

• 14 наурыздан бастап Наурызнаманың 10 күндігі басталды. Ел бойынша 1,5 мыңнан астам іс-шара өтеді. Негізгі мерекелік шаралар 21–23 наурыз күндеріне жоспарланған.