Астанада аутизм туралы ақпарат тарату күніне арналған Ашық есік күні өтеді

2 сәуір – Дүниежүзілік аутизм туралы ақпарат тарату күніне орай елордада ерекше маңызы бар әлеуметтік іс-шара ұйымдастырылады. Астана қаласы, Тұран даңғылы, 36 мекенжайында орналасқан Ұлттық балаларды оңалту орталығы (ҰБОО) «Көк түспен жарықтандыр» халықаралық акциясы аясында Ашық есік күнін өткізеді. Шара сағат 10:00-де басталады.

Бұл бастама Дүниежүзілік аутизм туралы ақпарат тарату күні шеңберінде өткізіліп, қоғамның аутизм спектрі бұзылыстары (АСБ) туралы түсінігін кеңейтуге бағытталған. Соңғы жылдары АСБ диагнозы қойылған балалар санының артуы бұл мәселенің өзектілігін арттырып отыр.

ҰБОО – еліміздегі балаларды оңалту саласындағы жетекші орталықтардың бірі. Мұнда заманауи әдістемелер енгізіліп, білікті мамандар даярланады. Орталық ерекше қажеттіліктері бар балаларға кешенді көмек көрсетіп, олардың қоғамға бейімделуіне жағдай жасайды.

Ашық есік күні аясында орталық мамандары аутизм спектрі бұзылыстары бойынша кеңестер беріп, ата-аналарға арналған оқыту және психологиялық тренингтер өткізеді. Сонымен қатар тақырыптық көрмелер ұйымдастырылып, түрлі әлеуметтік акциялар жүзеге асырылады.

Іс-шараның маңызды жаңалығы – «Мен ерекшемін – түсіністікпен қараңыз» атты әлеуметтік белгішенің алғашқы таныстырылымы. Бұл белгіше ерекше балалардың қоғамдық ортада өзін қауіпсіз әрі жайлы сезінуіне ықпал етуді көздейді. Сондай-ақ қоғам мүшелерінің толерантты көзқарасын қалыптастыруға бағытталған.

Мұндай бастамалар инклюзивті қоғам құру жолындағы маңызды қадамдардың бірі. Ашық есік күні – тек ақпараттық шара ғана емес, сонымен қатар ерекше балалар мен олардың отбасыларына қолдау көрсетудің нақты көрінісі.