25 шақырым жүгіріп, сыйлық ұтып ал!
Астана тұрғындары Республика күнін ерекше форматта атап өте алады. Қалада «25 қазан – 25 шақырым» атты онлайн-марафон ұйымдастырылады. Қатысушылар жеті күн ішінде жаяу жүріп немесе жүгіріп, белгіленген қашықтықты еңсеріп, сыйлықтар ұтысына қатыса алады.
Бастаманы Астана қаласының әкімдігі мен қалалық Дене шынықтыру және спорт басқармасы қазақстандық AI SPORT платформасымен бірлесіп жүзеге асырады. Іс-шара Республика күніне және Мемлекет басшысы жариялаған Цифрландыру және жасанды интеллект жылына орайластырылған.
Ортақ маршрут жоқ: әркім өзіне ыңғайлы жерде қатыса алады
Онлайн-марафонның ерекшелігі – қатысушыларға ортақ бастау нүктесі мен арнайы бағыт белгіленбейді. 25 шақырымды бір күнде жүріп өту де міндетті емес. Ең бастысы – жеті күн ішінде жалпы қашықтықты орындау.
Қатысушылар таңертең жүгіруге, кешкі серуенге шығуға немесе күнделікті жүріп өтетін жолын пайдалануға болады. Әркім өзіне қолайлы уақыт пен қарқынды таңдайды.
Астана қаласы Дене шынықтыру және спорт басқармасының баспасөз хатшысы Мадина Айтқалиеваның айтуынша, онлайн формат тұрғындарға спорттық іс-шараларға кез келген жерден қатысуға мүмкіндік береді.
«Біздің мақсатымыз – Астана тұрғындарын осы бастамаға барынша көптеп қатыстыру және Республика күнін денсаулыққа пайдалы іспен атап өтуге ынталандыру», – деді ол.
Қалай қатысуға болады?
Марафонға Астананың 18 жасқа толған тұрғындары қатыса алады. Ол үшін AI SPORT қосымшасын жүктеп, тіркеліп, онлайн-марафонға қосылу қажет.
Әр серуен немесе жүгіру алдында қосымшадағы GPS-трекерді іске қосу керек. Жүйе жүріп өткен қашықтықты тіркеп, нәтижені қатысушылардың ортақ кестесінде көрсетеді. Көлікпен жүрген жол есепке алынбайды.
Белгіленген 25 шақырымды жеті күн ішінде еңсерген қатысушыларға электронды сертификат беріледі. Ұйымдастырушылар медаль табыстамайды.
Қатысушылар арасында 10 сыйлық ойнатылады
Марафонға қатысушыларды ынталандыру үшін ұйымдастырушылар 10 сыйлық пен жүлде дайындаған. Олардың қатарында құлаққаптар, «Алиса» ақылды колонкалары және AI SPORT символикасы бар фирмалық маскоттар бар.
Жеңімпаздар Instagram желісіндегі тікелей эфирде кездейсоқ таңдау арқылы анықталады. Яғни қашықтықты кімнің жылдам жүгіріп өткені немесе қосымша шақырым жүргені маңызды емес. Әр қатысушының ұтысқа қатысу мүмкіндігі бірдей.
AI SPORT негізін қалаушы Ғабит Салтыбаевтың айтуынша, жобаның мақсаты – заманауи технологиялардың көмегімен бұқаралық спортты қолжетімді ету және тұрғындарды белсенді өмір салтына ынталандыру.
Осылайша, Астананың тұрғындары Республика күніне орай арнайы жарыс алаңына бармай-ақ, күнделікті серуені мен жүгіруін ортақ спорттық бастамаға айналдыра алады.
