Астанада бұқаралық шаңғы жарысы өтті: 700-ден астам адам спорт мерекесіне қатысты

24 қаңтар күні Астананың орталық саябағында бұқаралық шаңғы жарысы өтті. Ауқымды спорттық шараға 530-дан астам адам қатысып, қысқы спорттың дамуына өз үлесін қосты. Ал жарыс аясында ұйымдастырылған басқа спорт түрлеріне 180-нен аса қатысушы тіркелді.

Аталған жарыс пен спорттық бағдарламаны ұйымдастыруға 25 жылға жуық уақытын спорт саласына арнаған тәжірибелі төреші, спорт маманы Хамзин Дәулет ағай жетекшілік етті.

— «Мен бұл салаға шамамен 25 жыл бұрын келдім. Сол уақыттан бері жарыстарды басқарумен, ұйымдастырумен айналысып келемін. Біздің мақсат — осы спорт түрлерін қарапайым деңгейден бастап, мемлекет, ұлттық дәрежеге дейін көтеру болды», — дейді Хамзин Дәулет ағай.

Биылғы жарыстың ерекшелігі — қатысушылар санының көптігі.

•Бұқаралық шаңғы жарысына – 530-дан астам адам

•Қол күрес, гір тасын көтеру, белбеу күресі секілді басқа спорт түрлеріне – 180-нен аса адам қатысқан

Жарыстар жас ерекшеліктері бойынша 8 категорияда өтті. Әр категорияда ерлер мен қыздар бөлек сынға түсті.

Жарыс аясында келесі спорт түрлері қамтылды:

•Қол күрес

•Гір тасын көтеру

•Белбеу күресі

Әр спорт түрі бойынша 1-ден 6-орынға дейін жүлделі орындар анықталып, жеңімпаздар арнайы сыйлықтармен марапатталды.

— «Біздің мақсат — тек жарыс өткізу емес, халықты спортқа тарту. Сондықтан марапаттау жүйесін кеңейтіп, көп адамды ынталандыруға тырыстық», — дейді ұйымдастырушы.

Жарыстың соңында қатысушылар арасында лотерея ұйымдастырылып, түрлі бағалы сыйлықтар ойнатылды. Сонымен қатар, қыздар арасындағы жеке номинациялар бойынша арнайы марапаттар табысталды.

— «Бұл — үлкен спорт мерекесі. Көрермен де, қатысушы да риза болып қайтса — біздің еңбегіміздің ақталғаны», — деп атап өтті Хамзин Дәулет ағай.

Хамзин Дәулет ағай спорттың бірнеше түрімен айналысқан тәжірибелі маман. Оның айтуынша, өзі спорттың ішінде шаңғыны ерекше жақсы көреді, ал кәсіби жолында футбол төрешісі ретінде танылған.

— «Мен негізінен футболдан төреші болдым. Қазақстан Республикасының футболында, премьер-лигада қызмет атқардым. Уақыт өте келе үлкен футболдан кетіп, төрешілік пен спорттық жарыстарды ұйымдастыруға көбірек көңіл бөлдім», — дейді ол.

25 жылдық тәжірибесі бар маман үшін спорт — тек жұмыс емес, өмірлік миссия. Оның басты мақсаты — бұқаралық спортты дамыту, жастарды салауатты өмір салтына тарту және әділ төрешілік мәдениетін қалыптастыру.

Осындай шаралардың арқасында Астанада бұқаралық спортқа деген қызығушылық артып, жүздеген адам бір күнде спорт мерекесінің куәсі болды.