Астанада конкурдан Қазақстан Республикасының чемпионаты өтеді
2026 жылғы 27–29 наурыз аралығында Астана қаласында конкур (кедергілерден өту) дисциплинасы бойынша Қазақстан Республикасының чемпионаты өтеді. Ауқымды спорттық дода қаладағы «Арғымақ» ат-спорттық сауықтыру кешенінің базасында ұйымдастырылып, еліміздің үздік шабандоздары мен жүйрік аттарын бір алаңға жинамақ.
Бұл чемпионат – ұлттық ат спорты күнтізбесіндегі маңызды жарыстардың бірі. Жыл сайын дәстүрлі түрде өтетін додада тәжірибелі спортшылармен қатар, жас таланттар да бақ сынап, өз шеберліктерін көрсетеді. Жарыс барысында қатысушылар түрлі деңгейдегі маршруттарда өнер көрсетіп, кедергілерден дәл әрі жылдам өту арқылы өзара мықтыны анықтайды.
Конкур – ат спортының ең күрделі әрі көрерменге тартымды түрлерінің бірі. Мұнда шабандоз бен аттың өзара үйлесімі, дәлдігі мен жылдамдығы шешуші рөл атқарады. Сондықтан чемпионат тек жарыс қана емес, кәсіби шеберлікті, дайындық деңгейін және спорттық рухты айқын көрсететін алаң саналады.
Аталған іс-шара Қазақстан Республикасы Туризм және спорт министрлігінің Спорт және дене шынықтыру істері комитетінің, РГКП «РУМАЦ», Қазақстан Республикасының ат спорты федерациясының қолдауымен, сондай-ақ «Kazzinc» компаниясының демеушілігімен өтеді. Жарыс Международная федерация конного спорта (FEI) талаптары мен халықаралық стандарттарына толық сәйкес ұйымдастырылып, жылқылардың әл-ауқаты мен қауіпсіздігіне ерекше мән беріледі.
Чемпионат елдегі ат спортының дамуына серпін беріп, халықаралық аренада бәсекеге қабілетті спортшыларды дайындауға мүмкіндік жасайды. Сонымен қатар, бұл жарыс көрермендер үшін де әсерлі әрі тартысты сәттерге толы спорт мерекесіне айналмақ.
