Астаналық оқушы Harvard University университетіне оқуға түсті
Астана қаласындағы Республикалық физика-математика мектебі оқушысы Бөрте Сайранбекқызы әлемдегі ең беделді жоғары оқу орындарының бірі — Harvard University университетіне оқуға қабылданып, отандық білім жүйесінің әлеуетін тағы бір мәрте дәлелдеді.
Бөртенің жетістігі – кездейсоқ нәтиже емес, ұзақ жылдар бойғы жүйелі еңбектің, табандылықтың және нақты мақсатқа бағытталған дайындықтың жемісі. Ол мектеп қабырғасында жүріп-ақ Advanced Placement (AP) бағдарламасының мүмкіндіктерін толық пайдаланып, академиялық деңгейін ерте кезеңнен бастап халықаралық стандарттарға сәйкестендірді. 10-сыныптан кейін түрлі пәндер бойынша 7 емтихан тапсырып, AP International Diploma иегері атануы – оның білімге деген жауапкершілігінің айқын көрінісі.
Бөрте бірнеше тілді еркін меңгерген көптілді тұлға ретінде де ерекшеленеді. Қазақ, орыс және ағылшын тілдерінен бөлек, қытай тілін де тереңдетіп оқып, AP бағдарламасы аясында бұл тілден де емтихан тапсырды. Сонымен қатар, SAT, IELTS, CAE және HSK сияқты халықаралық емтихандарда жоғары нәтижелер көрсетіп, өзінің академиялық әлеуетін дәлелдеді.
Оқу барысында Бөрте ғылыми-зерттеу жұмыстарына белсенді қатысып, мектеп қолдауымен халықаралық ғылыми бағдарламаға іріктеуден өтті. Осы бағдарлама аясында АҚШ университетінің профессорының жетекшілігімен білім алып, зерттеу жүргізуі – оның ғылыми ойлау қабілетінің жоғары деңгейде қалыптасқанын көрсетеді.
Сонымен қатар, ол тек академиялық жетістіктермен шектелмей, әлеуметтік және шығармашылық бастамаларға да белсене қатысып, жан-жақты дамыған тұлға екенін көрсетті. Мұндай теңгерім – қазіргі заманның бәсекеге қабілетті жастарына тән маңызды қасиеттердің бірі.
Үздік шәкірттің айтуынша, Harvard University-ге түсу – жүйелі дайындықтың, тұрақты мотивацияның және сапалы білім беру ортасының нәтижесі. Бұл жетістік тек Бөртенің жеке жеңісі ғана емес, сонымен қатар қазақстандық жастардың әлемдік деңгейде бәсекеге қабілетті екенін дәлелдейтін маңызды көрсеткіш.
Бөрте Сайранбекқызының табысы – арманы биік, мақсаты айқын жас буынға үлкен шабыт.
