Елордада 700 адам веломаусымды ашты
Елордада салауатты өмір салтын насихаттайтын ауқымды велошеру өтті. Іс-шара Таза Қазақстан бастамасы мен «Заң мен тәртіп» қағидаты аясында ұйымдастырылып, қала тұрғындарын бір мақсатқа біріктірді.
Астана көшелерінде таңғы салқынмен басталған бұл шараға жүздеген адам қатысты. Қатысушыларды тіркеу ерте – сағат 07:30-да басталып, 09:00-де велошеру ресми түрде жолға шықты. Жалпы саны 700-ге жуық адам тіркеліп, қаладағы ең белсенді спорттық шаралардың біріне айналды.
Велошерудің бағыты да ерекше әсер қалдырды. Қатысушылар Қосшы бағыты бойындағы айналма веложолдан бастап, Жасыл белдеу саябағы аумағында мәреге жетті. Жалпы ұзындығы 21 шақырым болатын бұл бағыт қатысушыларға төзімділік пен жігерді қатар сынауға мүмкіндік берді.
Ұйымдастырушылардың айтуынша, мұндай шаралардың басты мақсаты – қала тұрғындарын бұқаралық спортқа тарту, әсіресе велоспортты кеңінен насихаттау. Велосипед тебу тек денсаулыққа пайдалы ғана емес, экологияға да зиянсыз көлік түрі ретінде маңызды рөл атқарады.
Жол бойы бір-бірін қолдап, ортақ рухпен алға ұмтылған қатысушылар бұл күнді ерекше естелікке айналдырды. Велошеру тек жарыс емес, белсенді өмір салтын таңдаған жандардың мерекесіне айналды.
