Аланияда өтетін марафон Халықаралық трейлраннинг қауымдастығымен (ITRA) танылған беделді шара. Қатысушылар Тавр тауларының баурайындағы жайлаулар мен қарағайлы ормандарды аралап өтіп, тарихи Терсхане (кеме жасау зауыты) маңында мәреге жетеді.
Жарыс бағдарламасындағы ең қысқа 5 шақырымдық «Alanya Castle Run» бағыты қаланың ең көрікті жерлерін паш етсе, 68 шақырымдық басты қашықтық төзімділікті сынайды.
Жерорта теңізінің жағасында орналасқан Алания — тарих пен бүгінгі заманның ажырамас бірлігі. XIII ғасырда Селжұқтар негізін қалаған бұл қала бүгінгі күнге дейін жақсы сақталған Алания қамалымен мақтана алады. Қамалдан төмен қарай созылған тар көшелер дәстүрлі үйлер мен жайқалған бақтарға ұласып, теңіз жиегіне дейін апарады.
Мұндағы табиғи көрікті жерлердің қатарында «Көк ту» иегері атанған Инджеқұм мен Клеопатра жағажайлары, сондай-ақ Сападере каньоны мен Дим өзені бар. Бұл мекендер көктемде ерекше құлпырып, серуендеуге таптырмас жағдай жасайды.
Спорттық додадан кейін Аланияның бай асханасынан дәм тату — бөлек бір ғанибет. Көше тағамы — гөзлемеден бастап, Жерорта теңізінің балғын теңіз өнімдеріне дейін талғампаз жанның қалауынан шығады. Әсіресе, отқа піскен сегізаяқ пен балық тағамдары жергілікті тахини қосылған «пияздармен» (ақ бұршақ салаты) керемет үйлеседі.
