Қалалар өсіп, ауылдар азайып жатыр: елдегі халық саны туралы жаңа мәлімет
Ұлттық статистика бюросы 2026 жылғы 1 шілдедегі Қазақстан халқының саны туралы жаңартылған мәліметті жариялады. Ел халқы 20,5 миллионнан асып, қала тұрғындарының саны артып, ауыл тұрғындарының саны азаюын жалғастырып отыр.
Ұлттық статистика бюросының мәліметінше, 2026 жылғы 1 шілдедегі жағдай бойынша Қазақстан халқының саны 20 590 589 адамға жетті. Жыл басынан бері ел тұрғындарының саны 90 767 адамға артқан.
Ең көп халық тұратын қала – Алматы. Мұнда 2 373 772 адам тұрады. Жыл басынан бері мегаполис халқы 25 669 адамға көбейген.
Ал Түркістан облысының халқы алғаш рет 2 миллионнан асып, 2 145 680 адамды құрады. Дегенмен жыл басынан бері өңір тұрғындарының саны 3 525 адамға азайған.
Халқы 1 миллионнан асатын өңірлер:
- Астана — 1 682 721 адам;
- Алматы облысы — 1 612 393 адам;
- Шымкент — 1 310 681 адам;
- Жамбыл облысы — 1 212 698 адам;
- Қарағанды облысы — 1 130 377 адам.
Ең аз қоныстанған өңірлер:
- Ұлытау облысы — 218 015 адам;
- Солтүстік Қазақстан облысы — 511 982 адам;
- Абай облысы — 592 895 адам.
Сондай-ақ статистика қала тұрғындарының саны өсіп келе жатқанын көрсетеді. Қазір қалаларда 13 190 585 адам тұрады, бұл жыл басымен салыстырғанда 105 475 адамға көп. Ал ауыл тұрғындарының саны 7 400 004 адамды құрап, 14 708 адамға азайған.
