Қазақстандықтар балалар үйінің жасөспірімдерін қолдауға 42 млн теңгеден астам қаражат жинады
Қазақстанда ата-анасының қамқорлығынсыз қалған жасөспірімдерді қолдауға бағытталған ауқымды қайырымдылық науқаны мәресіне жақындап қалды. Қаңтар айының ортасына қарай қазақстандықтардың ерікті түрде аударған қаражаты 42 миллион теңгеден асып, қоғамда жүйелі қайырымдылық пен балалардың әлеуметтік бейімделуіне деген жауапкершіліктің артып келе жатқанын көрсетті.
«Дара» қайырымдылық қоры ұйымдастырған «Тәлімгер — баланың қасында қалатын сый» атты науқан «Тәлімгерлер» бағдарламасының 10 жылдығына орай өткізілуде. Акция 15 қаңтарда аяқталады. Қордың алдын ала мәліметінше, қазіргі таңда 42 300 000 теңгеден астам қаржы жиналған. Бұл — Қазақстандағы алғашқы әрі бірегей жүйелі тәлімгерлік бағдарламасына қоғам тарапынан көрсетілген жоғары сенімнің айғағы.
Он жыл ішінде жоба бір реттік сыйлықтар мен қысқа мерзімді көмектің орнына ұзақмерзімді, кәсіби қолдаудың тиімді екенін дәлелдеді. Бағдарлама аясында еліміздің 19 өңірінде балалар үйлерінің тәрбиеленушілері мен еріктілер арасында 400-ге жуық «тәлімгер–жасөспірім» жұбы құрылған. Мұндай қарым-қатынас жасөспірімдердің өмірлік бағдарын айқындап, дербес өмірге дайындалуына көмектеседі.
Мамандардың айтуынша, тәлімгерлік — материалдық көмектен әлдеқайда маңызды әлеуметтік мәселені шешеді. Тәлімгер бала үшін сенімді ересек адамға айналып, шешім қабылдауда бағыт береді, өзіне деген сенімділікті қалыптастырады және мекемеден тыс өмірге бейімделуіне қолдау көрсетеді. Бұл бастаманы қарапайым азаматтармен қатар бизнес өкілдері де белсенді қолдап отыр.
«Бағдарламаға қатысқан жасөспірімдердің өмірі түбегейлі өзгеретінін көріп отырмыз. Олардың өмірінде алғаш рет сенімге негізделген, жылы қарым-қатынас пайда болады. Бұл өз болашағын айқын көруге, мақсат қоюға және ересек өмірге сенімді қадам басуға мүмкіндік береді», — дейді «Дара» қорының өкілдері. Қор 2026 жылы еліміз бойынша тағы 100 жасөспірімге тәлімгер табуды мақсат етіп отыр.
Айта кетейік, қазақстандықтарда бастаманы қолдауға әлі екі күн бар. Қаражат жинау 15 қаңтар күні түн ортасында аяқталады. Жиналған барлық қаражат жаңа тәлімгерлерді іздеуге, іріктеуге және оқытуға, сондай-ақ «тәлімгер – бала» жұптарын психологиялық сүйемелдеуге бағытталады. Науқанға fundaraising.kz ресми платформасы арқылы қатысуға болады.
«Дара» қорының «Тәлімгерлер» бағдарламасы 2015 жылдан бері жұмыс істейді және бүгінде Қазақстан бойынша 26 балалар мекемесін қамтиды. Бұл — елімізде ерікті тәлімгерлерді кәсіби іріктеуді және ұзақмерзімді қолдауды қамтамасыз ететін бірегей жоба.
