Болашақпен тілдесуді үйрететін орын: Alem.ai қандай орталық?
Мұнда оқушылар білім алады, стартаптар дамиды, ал жаңа технологиялар нақты шешімге айналады. Alem.ai – цифрлық дәуірдің жаңа мүмкіндіктер алаңы.
Астанада халықаралық ALEM.AI жасанды интеллект орталығы жұмысын бастады. EXPO аумағында орналасқан бұл жаңа кеңістік білім беру, ғылым, технология және кәсіпкерлікті бір арнаға тоғыстырып отыр. Мұнда жасанды интеллектіні үйренуге де, зерттеуге де, оны нақты жобаларға айналдыруға да мүмкіндік бар.
ALEM.AI-ды жай ғана технологиялық хаб деу аздық етеді. Бұл – идеяның туындауынан бастап оның толыққанды өнімге айналуына дейінгі жолды қамтитын экожүйе.
Орталық сегіз қабатты алып жатыр. Мұнда оқу сыныптары, зертханалар, стартаптарға арналған алаңдар және цифрлық шешімдер әзірлейтін арнайы орталықтар орналасқан. Келушілерді жасанды интеллектінің даму тарихымен таныстыратын интерактивті көрме қарсы алады. Онда алғашқы бағдарламалардан бастап бүгінгі заманауи технологияларға дейінгі кезеңдер қамтылған.
Орталықтың басты бағыттарының бірі – білім беру. Жасөспірімдерге арналған TUMO Astana бағдарламасы арқылы оқушылар бағдарламалау, анимация, ойын әзірлеу, дизайн, музыка және басқа да шығармашылық-технологиялық бағыттарды тегін меңгере алады. Бұл жоба Орталық Азияда алғаш рет жүзеге асырылып отыр.
Ересектер үшін Tomorrow School бағдарламасы жұмыс істейді. Мұнда мамандығы мен тәжірибесіне қарамастан кез келген адам бағдарламалауды үйреніп, өз жобасын немесе стартабын дамытуға мүмкіндік алады. Бағдарлама қатысушыларды тек теориямен емес, нақты өнім жасауға бағытталған тәжірибемен қамтамасыз етеді.
Ал биыл қыркүйекте ALEM.AI базасында жасанды интеллект университеті ашылады. Оның ерекшелігі – технологияны нақты салалармен ұштастыруында. Студенттер жасанды интеллектіні медицинада, энергетикада, мемлекеттік басқаруда және экономиканың басқа да бағыттарында қолдануды үйренеді.
Орталық тек маман даярлаумен шектелмейді. Мұнда қалалар мен мемлекеттік жүйелердің жұмысын жетілдіруге арналған цифрлық шешімдер де әзірленеді. Соның бірі – Astana Smart City платформасы. Бұл жүйе қала қызметтерінен келетін мәліметтерді бір орталыққа жинап, түрлі мәселелерге жедел әрекет етуге мүмкіндік береді.
ALEM.AI алаңында бизнес өкілдері, зерттеушілер, әзірлеушілер мен мемлекеттік құрылымдар бірлесіп жұмыс істемек. Нәтижесінде ел ішінде ғана емес, халықаралық нарыққа шығуға қабілетті жаңа технологиялық жобалар дүниеге келеді деген жоспар бар.
Орталықтың басты ерекшелігі де осында. Мұнда мектеп оқушысынан бастап тәжірибелі маманға дейін өз орнын таба алады. Бірі алғашқы қадамын жасаса, енді бірі өз идеясын әлемдік деңгейдегі өнімге айналдыруға мүмкіндік алады.
Орталықтың ашылуында сөйлеген сөзінде Мемлекет басшысы Қасым-Жомарт Тоқаев алдағы жылдары елімізге жасанды интеллект пен deeptech саласында кемінде 100 мың маман қажет болатынын атап өтті.
ALEM.AI осы мақсатқа жетуге бағытталған маңызды қадамдардың бірі саналады. Өйткені мұнда жасанды интеллект болашақтың технологиясы ретінде емес, бүгінгі күннің мүмкіндігі ретінде қарастырылады. Жаңа идеялар, жаңа мамандар және жаңа шешімдер дәл осы жерден бастау алмақ.
